Rayo lah dakek, hati mande makin taibo. Jatuah badarai aia mato mambasahi pipi nan lah mulai karuik.
Tabayang anak di tanah subarang. Lah limo taun indak pulang. Antah sakik, antahnyo sanang Tangiang-ngiang anak maimbau. Tabao rasian katiko lalok.
Tamanuang mande di kapalo janjang, mancaliak juo ka ujuang jalan. Raso si Buyuang ka tibo juo.
Tiok tadanga oto baranti, mato mande, indak mangijok, sia garan nan turun.
Buyuang anak mande, pulanglah. Caliaklah rumah gadang indak barono lai. Dindiang lapuak, atok lah tirih pulo.
Buyuang anak mande, kok nyampang singkek umua mande, kamano Buyuang tampek mangadu. Lapa ka sia mintak nasi, auih ka sia mintak minum, nak.
Pulanglah, nak. Rayo lah dakek. Mande indak arok jo pitih banyak, ameh babilang, indak pulo nio jo oto rancak. Di mande nan paralu Buyuang, lubuak hati malahan jiwa.
Pulangkan nak! (espe)
